BarCamp Caspian 2009, Qafqaz Universiteti

Nəhayət ki, BarKamp Azərbaycan təşkilatının yeni saytı işıq üzü gördü! Yeni saytımız üzərində iş uzun getsə də nəticənin barkampçıların xoşuna gələcəyinə inanırıq. Resursumuz web 2.0 imkanlarını təbliğ etmək məqsədi ilə əsasən pulsuz alətlər və OpenSorce proqramların köməyi ilə qurulmuşdur.

İstifadə olunmuşdur:

• Platforma: Wordress
• Tema (Şablon): Barkamp Azərbaycan tərəfindən hazırlanıb (Dizayner:  Sadiq Muradov)
• İstifadə olunmuş alətlər: Google Calendar,  Google Docs
• Sosial profillər: Twitter, Facebook
• Video kanal: Youtube
• Foto albom: Picasa

Web 2.0 xidmətinə aid bütün sosial profil və hesablarımzı yadda salxamaq çox asan olub – hamısı barcampaz adlanır.

Saytımız hələ ki, tam hazır deyil və üzərində iş davam edir. Yeni Saytımız haqqında fikirlərinizi və təkliflərinizi bizimlə paylaşmağı unutmayın!

Bundan sonra bir sual qalır – Barkamp nə vaxtdır? Bu sualın cavabı özünü sayt qədər gözlətməyəcək – lap tezliklə biləcəksiniz!

Üçünçü sosial bloqçuluq müsabiqəsində I yerin təqdimatı

Yanvarın 18-i Azərbaycan Media Mərkəzində Gənc Bloqçular Şəbəkəsi layihəsi çərçivəsində keçirilən “Sosial Bloq Yazıları 3” müsabiqəsinin qaliblərinin mükafatlandırması mərasimi keçirilib.

Müsabiqəyə təqdim edilən 116 bloq yazılarını təcrübəli bloqçu və media mütəxəssislərindən ibarət münsiflər heyəti tərəfindən müxtəlif kriterilər üzrə qiymətləndirilmişdir. “Sosial Bloq Yazıları 3” müsabiqəsinin I yerin sahibi Məhv edilən keçmişimiz… adlı yazı ilə Araz Bayramov (Bakı) olub. II yerin sahibi də Bakı şəhər sakini Aytən Süleymanova (Bakı)  ”Sizin paraşütünüz hansı rəngdədir?“dır. III yeri isə Sumqayıtdan Cavid Həsənov “Boynu bükük yolka dirəyi və kəsilməyini gözləyən şam ağacı“ tutub.

Sonrakı 5 həvəsləndirici yerləri isə aşağıdakı yazılar qazanıb:

• Səbinə Vaqifqızı (Bakı) “Ziyalı kimdir sualından mədəni çevrilişə“
• İlham Əkbərli (Bakı) “Şaxta Bobiyə məktub“
• Gülarə Əzimzadə (Bakı) “Niyə pirat disklər almaq təhlükəlidir?“
• Fərid Hacıyev (Şəki)  ”Nə çətin imiş Azərbaycan vətəndaşı olmaq?“
• Mirzə Dadaşov (Bakı)  ”Əvvəl asfalt çəkirik, sonra qazıb kanalizasiya“

Bunlarla yanbaşı daha 10 gənc bloqçu GBŞ layihəsindən domen və “Sahil İT”-dən hostinq hədiyyələri qazanmışlar.

Ümümilikdə, müsabiqədə Azərbaycanın müxtəlif regionlarından – Bakı, Gəncə, Şəki, Sumqayıt, Mingəçevir, Zaqatala, Şabran, Şirvan və Tovuzdan bloqçular iştirak edib. Müsabiqə haqda daha ətraflı məlumat və müsabiqəyə verimiş yazıların siyahısını www.sosium.com saytından əldə etmək olar.

“Sosial Bloq Yazıları 3″ müsabiqəsi “Gənc Bloqçular Şəbəkəsi” layihəsi çərçivəsində keçirilmişdir və məqsədi gənclər arasında sosial bloqçuluğu inkişaf etdirməkdir. Ümumiyyətlə, “Gənc Bloqçular Şəbəkəsi” çərçivəsində Gəncə, Şəki və Sumqayıt şəhərlərində bloqçuluq mövzusunda 9 təlim, müxtəlif şəhərlərdə 20-dən çox seminar və 2 yazı müsabiqəsi təşkil olunmuşdur. Bu layihə Counterpart International təşkilatının icra etdiyi ABŞ Beynəlxalq İnkişaf Agentliyinin (USAİD) Vətəndaş Cəmiyyəti layihəsi çərçivəsində maliyyələşdirilib və Gənc Bloqçular Koalisiyası tərəfindən icra olunub. Bu koalisiya BarKamp Azərbaycan təşkilatının təşəbbüsü ilə yaradılmışdır.

Sosial Bloq yazıları müsabiqəsinin təqdimatından

Sosial Bloq Yazıları müsabiqəsinin ən azı ikisində iştirak edənlərə pulsuz domen və hostinq verildi

sosium.com saytı Millinet 2010-da I yerə çıxarkən

Barkamp Azərbaycanın Yaz-Yay Məktəbi və Gənc Bloqçular Şəbəkəsi layihələrinin bir hissəsi olan Sosium.com kollektiv bloq saytı dekabrın 4-də keçirilən MilliNet 2010 – Milli İnternet Mükafatı müsabiqəsində “İstifadəçi məzmunu üzərində qurulmuş ən yaxşı sayt” nominasiyasında qalib gəlib. Kollektiv bloq saytı olan Sosium.com-un məqsədi sosial bloqçuluq platforması yaratmaqdır.Bu bloqda hər bir bloqer qeydiyyatdan keçərək cəmiyyətimizdə baş verən müxtəlif sosial hadisələr barədə öz fikirlərini və müşahidələrini yerləşdirə bilər. Bu saytda yerləşdirilən hər bir yazıya görə müəlliflərin özləri məsuliyyət daşıyırlar, eyni zamanda təşkilatın, tərəfdaşların və donorların mövqelərini əks etdirməyə də bilərlər.

Sosium.com saytı bloqlar və İnternet haqqında təlimlər keçirən YazYay Məktəbi layihəsinin və bu layihənin davamı olan Gənc Bloqçular Şəbəkəsinin də bir hissəsidir. Bu layihələr çərçivəsində Sosial bloq yazıları müsabiqələri keçirilib ki, bunlarla da saytın Müsabiqə bölməsində tanış ola bilərsiniz.

Gənc Bloqçular Şəbəkəsinin Sumqayıtda təlimi

2010-cu ilin sentyabrından etibarən Azərbaycanda region gəncləri arasında sosial bloqçuluğun inkişaf etdirmək məqsədilə Gənc Bloqçular Şəbəkəsi layuhəsi icra olunur. Bu layihə BarCamp Azərbaycan təşkilatının təşəbbüsü ilə yaradılmış Gənc Bloqçular Şəbəkəsi (GBŞ) koalisiyası tərəfindən icra olunur. Koalisiya üzvləri BarKamp Azərbaycan, Uluçay Sosial-İqtisadi İnnovasiya Mərkəzi, Sumqayıt İnformasiya Texnologiyaları Akademiyası və İnformasiya Texnologiyaları, İnternet və Media (İTİM) təşkilatlarıdır.  Müddəti 5 ay nəzərdə tutulmuş layihənin əsas icraçısı BarKamp Azərbaycan təşkilatıdır. Layihə ərzində Sumqayıt, Şəki və Gəncə şəhərlərində 9 bloq haqqında təlim, Ucar, Mingəçevir, Zaqatala və Qazax şəhərlərində də daxil olmaqla 20-dən çox seminar təşkil olunacaq. Həmçinin sosium.com saytı təkmilləşdiriləcək və gənc bloqçular arasında “Sosial Bloq Yazıları Müsabiqəsi” keçiriləcək.

Layihənin əsas partnyorlarından biri IREX-dir. Seminar və təlimlərin böyük bir qismi məhz IREX təşkilatın regional mərkəzlərində təşkil olunacaq. Layihənin sonunda Şəki, Gəncə və Sumqayıt şəhərlərində bloqçu klubları təşkil olunacaqdır və regionlarda yeni gənc təlimçilər hazırlanacaqdır.

“Gənc Bloqçular Şəbəkəsi” layihəsi  Counterpart International təşkilatının icra etdiyi ABŞ Beynəlxalq İnkişaf Agentliyinin (USAİD) dəstəyi “Vətəndaş Cəmiyyəti Layihəsi layihəsi çərçivəsində maliyyələşdirilir.

Bloqosfer 2010-da təqdimatlar zamanı (Nabran, Xudat)

Barkamp Azərbaycan “İnformasiya Texnologiyaları, İnternet və Media” İctimai Birliyi (İTİM) ilə birlikdə növbəti uğuruna imza ataraq Bloqosfer 2010-Bloqçuların və Yeni Media mütəxəssislərinin I forumunu həyata keçirib.

“Bloqosfer 2010” Azərbaycanda ənənəvi forum və barkamp formatını özündə birləşdirən ilk forumdur. Burada üslubundan və sahəsindən aslı olmayaraq (texnoloji, sosial, elmi, ümumi, biznes və s) hər bir bloqçu və yeni media mütəxəssisinə müzakirələrə qoşulmaq və təkliflərini vermək şansı verilmiş idi.

Ənənəvi forumlardan fərqli olaraq, “Bloqosfer 2010”-da müzakirə olunacaq mövzular öncədən təşkilatçılar tərəfindən deyil, iştirakçıların özləri tərəfindən forum zamanı təyin edilmişdi. Sentyabrın 11-12-nə təsadüf edən forumun birinci günü iştirakçılar tərəfindən əsas 18 mövzu müzakirələr üçün təklif edildi. Onlar içərisindən forum iştirakçılarının gizli səsverməsi nəticəsində yeddi mövzu işçi qruplarında müzakirə edilmək  haqqı qazandı:

1. Bloqçular  jurnalistdirmi və bloqçuların hüquqları
2. Bloq və reklam
3. Bloqçuluğun etik normaları, dezinformasiya
4. Bloqlarda mövzu seçimi məsələsi, davamsızlıq
5. Bloqlar və regionlar
6. Bloqlarda Azərbaycan dili, translit, şivə
7. Multimedia bloggerliyinin inkişafı və yeni medianın yeni alətləri

Günün sonuna qədər mövzular ayrı-ayrı qruplarda müzakirə olunaraq təqdimatlar hazırlandı. Hazırlanmış təqdimatlar forumun ikinci günü bütün iştirakçıların müzakirəsinə və səsverməsinə təqdim edildi. Gizli səsvermə nəticəsində iştirakçılar 1-ci və 3-cü mövzulardan başqa bütün mövzuları qəbul ediblər.

“Bloqosfer 2010”-da həmçinin hər bir iştirakçıya forum zamanı öz fərdi ideya, təcrübə və yeni layihələrini təqdimatlar keçirilməsinə də imkan yaradılıb:

• “Multimedia bloqçuluğu, audio vizual dərslik” (A. Vugar, H.Hacı, Əhməd Muxtar),
• “Youth media- yeni media həvəskarlarının və gənc jurnalistləri bir arada toplayan platforma” (Vüsalə Əlibəyli),
• “Gənc Bloqqerlər Şəbəkəsi” (Jalə Nəcəfova, İlgar Mirzə),
• “Bloqqerlərin Şəbəkə saytı” (Baba Əliyev),
• “Sosial Media və Marketinq” (Şaiq Muradov),
• “Qrup bloqininq faydası” (Sadiq Muradov),
• “İdeyalar paylayıram” (Vahid Qasımov),
• “Wpusta.com -Bloqçuların problemlərinin operativ həlli” ( Rəşad Əliyev),
• “Dial up forever” (Samir Qədirov),
• “Yarı yalan yarı gərçək” (Tural Babayev),
• “İnternet tv” (Vüqar Səfərov)

Bloqosfer 2010 Açıq Cəmiyyət İnstitutu –Yardım Fondu, ABŞ-ın ölkəmizdəki səfirliyi ilə yanaşı “Gənc Bloqçular Şəbəkəsi” layihəsinin tərkib hissəsi kimi USAID və CounterPart İnternational Beynəlxalq təşkilatının Vətəndaş Cəmiyyəti layihəsi çərçivəsində də dəstəklənmişdir.